MARO OTHO EDALA NYARE KA ODHI LIMBE.

By Odhiambo Omolo
Dated; 9/28/07

Wuod Kendu, Wechegi tek chuth to kendo gin weche ma bende nyaka wuoye awuoya chuth.Wuondruok koro ngeny kendo magi e gak ma miyo gik moko timore ma otamo dhano wacho.

Wan kod Jodongo, Mine kod Jombetre man kod dwol e gwenge kaluwore kod dak margi ma ochanore kendo ma oriere kendo ongeyo kaka inyakal kony kata ngado rieko kuom weche matekgi eyo makare.

En buok ahinya ne ogandawa mar Onagi kod kit ngima ma koro thothji odonjoe.Yande aneno ka oket Osimbo ewi Jaduong moro ni Riaga maja Karachuonyo kaka Ker moluor ei piny Luo mangima, Pod ok aneno ka oluongo galamoro maduong ma oriwo anyuola duto mar Onagi mondo moa kuonde duto mondo olos weche kaka wanyalo dhi kod Timbewa kod Kitwa e kit dak marwa kaka Onagi kod welo ma koro odak kodwa kanyakla kaka jogwengwa.Wadwaro puonj ma oa kuom jok ma chalo Ker Riaga, ne oyiere nango kaok onyal nyiso ji kit dak marua kaka Onagi.

Pod amedo mana wacho kendo lando ni Joluo koa chon gilala negin kod Kitgi kod Timbegi ma ochanore chuth. Kik wawuondre ni wasomo koro timbewa mabeyo waweyo mondo watim gigo maricho.Ber mondo ngato ka ngato ma iluongo ni Onagi onge tiend Kitwa chuth.

Migosi Obongo Elisha Wuod Kendu Kanyadhiang, openjo penj maber sidang nikech kawuono en ira to kiny en iri. Maro en Wendo matekre ngeny sidang kendo bende ok onengo odhi ka ore kende maok obedo kata omakore kod nyieke kata nyawadgi moro.Maro en wendo chuth mabende ok onengo otho wuotho awuotha ma odhi kanyare maok ochiko nikech tije tek.Wuodh maro en wuoth ma nyaka chan maber chuth nikech Maro ne ber ka owuotho kata kod Yuore kata Yuoche moko ma dichuo. Chon gilala Maro ne ok donj od nyare to odhi odonjo mana od Nyawana mare ema ibudhe kod Nyiwen ni wetene. Bende ne ok onyal kata nindo ei od nyare to odhi onindo mana eod Nyawana mare kata kawatne moro modhi godo kun chiel. Wechegi koro barowa ndasi nikech thoth ji ok winj wach.Iyudo ka Maro osieko nie ot Kapango, Nyorobi Buore kata kuonde moko makoro Joluo odhiye yudo konyruok kod tije. Weche limbegi olos maling ling ma in kaka or to ikia chuth giloso mana kod nyare ni manyiso ni en ok one wich kuot kendo onyalo medo wachoni ni Tala mondo adhi Mbita. Mine masani koro ikendo thothgi gin yawa odongo maok ongeyo timbewa to (basics)onengo ginge. Owadu kata Nyaminu ok ikendi, Wede nitie makendore to nitiere wede maok kendruok godo.In kaka ja nyuol nyaka ipuonj nyathi kendo inyise wedene maonyalo kendore godo kendo maok onyal kendore godo.

Kik wabed kod wich kuot kuom penjo kuom dak marwa kaka anyuola mar Onagi. Kain Maro bed kaka Maro to kain Or to bed kaka Or. Wadimbre uru kuom dak marua.

An awuon, awuoyo kendo amedo jiwo nikik watug kod timbewa.Ok en miriambo to tem anena kalo chike Joluo mondo iwinjie epieni.Wich teko biro miyo ineno makne.

Kaok ingeyo to tem penjo ji kendo gibiro ngadoni rieko kaka inyalo loyo chandruokni no.

Nyasach Omogi Awando Otelnu Uduto e Piny Mangima