penjo kuom yik mar migogo

From: P Adhiambo

Wuon Abila, nyamera ne otho ka ja higni 24. Ne oyudo odak gi jal moro e achiel kuom bombe ma pacho kae to kata kamano ne podi ok gikawore e yor chik. (Ne gin e chenro ma dho Ngere luongo ni come-we-stay chande). Kata kamano tuo ne ogoyo nyamera ma onege kendo e kinde ma ne otuo ne oduogo e dala wuonwa ma watuoye nyaka chieng' thone. Bang' thone, wuonwa ma nene eka oyudo ogoyo ligala mare otieko higa achel nene okwer ni ok onyal hango ligala gi yiko migogo. Ma ne omiyo wayiko nyamera e gunda kwara ma ne oyudo koro onge ng'ato ma odakie (wuora odong' wuoyi achiel, jowadgi nene tindone to nene osetho duto kata ka pok ogoyo miethgi kendo moro jaode ne otho to moro jaode oa bang' thone). Koro sani waduaro timo rapar mar nyamera to wuonwa koro kendo oloko paro ni sawo to inyalo tim atima e dalane ni. Nene oweyore gi mama ka podi ok okendo minwa matin kendo bang'e minwa ne oduogo ka tuo ma otho ma oyik ka kwara. To minwa nene onyuolowa nyiri lilo. Minwa matin nyithinde tindonwa kendo gin yawuoyi.

Koro penjona gin magi:
1. Bende nitie rach hango ligala gi liend migogo ma podi ok onyuom?
2. Bende inyalo tim rapar (sap) ng'ato kama nene ok oyike?
3. An nyako matin nene akwongo na nyamera mauong' (opgore gi ma nene otho, nene wan nyiri adek to ma nene otho ema ne ni e diere, anto chogo) donjo, chiemo kendo nindo e ligala wuonwa, be nitie rach moro amora? Nene osetedo anto nene podi kata obedo ni ne an jahigni 20. Nene oyudo wadak oko waduto.

Erokamano kuom puonj.
Nyar Ong'eche.

---

Dwoko: 1 Kuom yiko migogo , onge kaka wuoro nyalo yiko nyare mosedhi tedo kata obedo nine pok onyuome. Kaluwore gi chike Luo en nyako mopong, ok nyal yike e dala wuon! Gima notimore ber nikech ka kwaro ema chalo kaka jakore ema inego yike. Nyako ma thunde osebiro kendo oseneno remo (dhi e dwe) kata pok okende to ok yike e dala wuon mare. Iyike e tok chiel kata e dala kwargi.

Dwoko: 2 Rapar (sawo) ok nyal tim e dala wuoro mane ok oyiko nyare, rapar unyalo timo ka kwaro kata obedo ni en gunda kamano.

Dwoko: 3 In kaka nyako matin onge kwe mane odinoni nindo dala wuoru, omiyo in onge richo mane itimo, nyameru chande pod nyalo donjo adonja e dala wuoru.

Adwoko erokamano Nyar Ong'eche kuom penjo mane iketo e yo mong'ith kendo imiya tich mayot kuom yudo fuondgi kaka anyalo fuonogi matindo tindo, mago to gi ma moko minyalo dwaro ng'eyo yie iorna mondo adwoki kaka nyalore, Hap Adikinyi Minwa mondo omenyni yore kendo omiyi ler mar neno ler kendo rito chike Kwere kaka owinjore, puonjruok ji puonjore nyaka tho, omiyo ong'e ng'ama ong'eyo duto!

Mogeni,

Mig. Ajos wuod Atiga Ny'Ochola
Wuon Abila, Jaluo dot Kom