penjo kuom nyuomo dhako bang' ka osetho

Penjo:

Wuon Abila,

Amosi ahinya. An gi penjo machalo kama: Omera ne okaw nyako ma odakgo kuom higa achiel gi wiye. Ne pod ok odhi dalagi, kata mana tero gimoro kaka pesa kata dhiang'. bang'e ne nyakoni otho ma oike, kendo oweyo nyathi achiel ma nyako mapod tin (9 months). Nikech weche ne otimore apoya nono, kendo wan bende lwetwa ne ni nono, Wuon nyako ne oyienwa ni waik aika nyako to bang'e ka wahero to wanyalo dhi limogi mondo "waket wadno obed motegno". Koro sani ka omerani oikore kendo en gi pesane moro, kata dhoge moko ma odwaro ni oterne jaduong'ne kuom jaode mane othoni, onyalo dhi adhiya koso nitie kuero moro kata chike moko ma nyaka olu?, nyaka odhi en owuon koso onyalo oro ji?, ka odhi to onindo kuro?

jamnigi donjo mana gi e rangach? ka okaw nyako moro bang'e, to ok oningo oter gimoro kuome ka podi ok onyuomo chiege mane oikoni? Ageno ni bedo ni otero gimoro kuom jaode mane onindoni ok ochuno ni nyaka koro ketne nyako moro kare (jarit nyathi?). Ka jodalagi nyako dwa timo ma to ere kaka onyalo kwerogi politely ma ok gineno rach moro?

Thanks
An Otieno

Dwoko:

Mig. Otieno adwoko erokamano kuom oronwa penjo kuom wach keny bang' tho nyako. Mano ber ahinya wechegi ok tek owaduno nyalo dhi adhiya oter chiaye manyisoni nyako ne osedakgo, mak mana kane pod oyik nyakono to nonego uter chiaye moro mar tieko kwer to kane ok utimo pod ok rach. Ka diponi nyakoni ok oter gimoro dalagi to nyathi mane oweyo bende ok nyal nyuom (kelo chiaye mar keny). Kendo owadu bende ka ok otieko chike dhakono to ok onyal tero gimoro thurgi nyako machielo monyalo. Jo-thurgi chiege ok ochuno ni nyaka miye nyako, mano herone owuon gi kaka giwinjore e kindgi.Onge kwero mar donjo gi e rangach. Kwe kende wuod Luo mago eweche ma aparo ni nitie kuom chike mag keny bang' tho nyako ma pok oter gimoro dalagi.

Wuon Abila