Maro otho e dala nyare kod wach kuom Ker Riaga Ogalo!

Kuom weche mane aselero kendo atemo fuono tiendgi maber kaka nyalore, wuod Rongo bende omedo lero kaka oneno owuon wuondruok nitie ei Luo, moloyo ne ogandawa monyono buk (Joma osomo) kod mago modak e pinje mag Ulaya, Amerka gi Asia madiere gi mabor. Moloyo to jogo modak pacho kaluo ok onego wuondre kuom rito chikewa kata matin. Akowo kwayoni ne "Ker" Riaga ma wuod Kasipul ni kik obed ekom ker to ok wiye owil gi tich ker! Kik opar ni ker en mana bedo ja siasa kendo fwambo weche mag ketho dongruok e piny Luo! Ooyo...! Ker en jaduong' pacho morito piny Luo mangima. Mig. Riaga onego bed ng'at molony e chike Luo kaka wuod Rongo osewachono. Kendo otem luongo buche moko manyalo riwo jopiny, kendo puonjo rawere Luo kitgi gi Timbegi, kaok kamano to wabiro luongo Referendum mondo waket yiero manyien. Mano nyalo miyo wayudo Ker mar adier kendo manyalo kelo dongruok e piny Luo.

Kadok chien to amedo fwono tiend wach mane Mig. Elisha Obong'o openjo kuom wach mar: "Maro otho e dala nyare kodhi limbe itimo nade?"

Nikech maro ok onego nind e dala kama okende nyare mak mana od Nyawande ema onyalo kawe ayul, mano miyo tich bedo matek ka maro otho e dala ore! nikech ok onyal nindo e dalano miyo ok nyal gole e dalano kopiele ariwa omiyo maber inyalo kete ka gima obet e kom kaka nyocha aselero kata maduong' moloyo imako yuothe kon gi kon kendo itiemo kiporo kagima ofwaro piny (Owuotho) to idhach kode kigole oko mar dala, mano inyalo wuog kode e rangach, to ka otho kotal ma ok onyal fwaro piny kamano to itucho kor chiel igolego kobet e kom kaka naselero mokwongo chande.

Ka maro otho e dala nyawande to igole e od nyawande gi jogo joma mon ma oluongo ni nyiwendene, Imako yuothe to obedo kaka ng'ama wuotho nyaka owuogi oko mar dala kama jodalagi biro kawe kendo kete e nyamburko manyalo tere thurgi. Mak mana mago duto gin gik moko matek ma kik warit mondo onyorwa gima ber ka maro tuo oingo kuma okende nyare to onego many kode yo mayot mar gole kapok gino okete piny.

Kaka wuod Rongo osewacho maro ok onego wuoth kende, onego owuoth gi nyiekene moko kata yuoche manyalo konyo weche machalgi mago ma asetemo lero malo kanyogo. Maro kik bi lim nyare akut kut mak ochiko.

Mogik atemo nyiso Nyikwa Ramogi ni Ker masani wan godo to ok olony e yor puonjo jopiny, kadiponi olonye to kare dak osetimo kaka dwarore kaka yande Ker Adala Otuko kod Ker Paul Mboya yande timo.

Wuon Abila