WACH MAR KENDRUOK MAR OUMA WUOD KARACHUONYO OPENJO.

By Odhiambo Omolo
Dated 10/2/07

Joluo ne owacho ni Sembe ipimo kod Nyamingi. Migosi Ouma Wuod Karachuonyo dwaro ngeyo wach maler kaka onyalo timo kod kend mare kod jaode. Ok onengo waduok paro mar Nyombo chien ni tinde ok nyuom mon dhok maen miriambo kendo wuondruok.Nyaka wange tiend kend kendo gima omiyo ka ikawo nyar piny moro to ber mondo inyuome. Dhako ne ipako ni rathuno kendo chieng ma okele edala kata chieng ma odonjo epacho to okelo hawi.Dhako en dongruok mar joka ngato kendo mar jopiny ma otedoe no.Dhako en medruok mar oganda nikech ka odonjo e pacho to obiro medo dongruok kod anyuola ma odonjo eno.Dhako ne inyuomo mondo kit dhano kik lal to nyuolruok omedre.Dhako ne ikelo mondo onyuol omed oganda.

En mana puonj jothurwa kik wawe ni koro wase somo ma ka iyudo nyar ngato idak godo nono to koro itieko weche duto.Dhako bedo kod duol edala ka ose nyuome tiende ni ose ter gimoro kaka chiaye maen dhiang mar roya kod ruath dalagi.Gima omiyo ne itimo kama tiende ni sama roya omako ich en ranyisi ni dongruok kod medruok ochakore ekind wuoyi kod chiege ma okendo chande. Dhiang mar ruath bende koro pong kendo inyal tueye mondo opur kode okel chiemo edala gi nyako. Nyuomo dhako ok en ngiewo dhako, kik ngato parni tero keny en ngiewo dhako maok en etiend kendruok ekind ogandawa mar Joluo.Nyuomo dhako tiende ni imiyo dhako sunga ei chunye kaka ihere kod jodalagi ema omiyo itero gimoro maber kata matekre ngeny kaka dhiang mondo igonego jonyuolne erokamano kuom rito kendo pidho ni ( nyako) dhako ma jaber ma koro en chiegi.Nyombo ne en gima oa chon omiyo nyaka wamed jiwo yawa ma pod tindo mondo gikend re maber kod joheragi.Onge kama oketie chik ni wan joluo ne waweko mon Mon mane ji weko gin mon mabayo mane iluongo ni ochode to bende jok mane wekore kodgigo bendo thothgi ne jawa ma ndachgi kata gundgi ok ber gi dholuo ne iluongogi ni joma obam kataJoma oran kata rawurni,Joluo ne ok nyal dak kod nyako ma obiro lime maloyo jumbe ariyo ni mano pod osiepne ooyo, bang jumbe ariyo en dhako makoro nie ode.Tinde awinjo dhok moro magalagala e thumbe makoro wuok ndalogi ni (You come we stay) Kain nyar Jaluo adiera kik iyie kod gima chalo kama timre nein.(Let us respect marriage).

Migosi Ouma, kaka Wuon Abila onyisi ni tem anena ipenj mamani gima ne omiyo dhok ne ok oter ma odonjo dalagi mamani.In iwuon dhok ma inyuomogodo chiegi ok nyal donjo dala gi chiegi nikech dhok mane onyuom godo mamau ne ok odonjo kakwaru maonyuolo mamau hie. Tem inon matut kendo kaber to nyaka babau ter dhiang madhi donj dala gi mamau eka in bende koro oyawoni maber makendo koro in thuolo kata mar dhi dalagi jaodi mondo oyengni. Eseche ma idhi dalagi jaodi mondo oyengni kik idhi kendi to dwar oweteni kata jogo modok kori mondo oteri wuoth mar dhi nindo (kajaduongni) korgi jaodi kendo mondo remo ochuerni piny.Kik itim gigi ka wuoru ne ok otimogi.Kaoponi wuoru ne ose tho to mamau nyaka yud youre moro mondo odhi otiekne kwergo duto mondo in bende iyud thuolo.Ok ochunore ni yuoreno nyaka kete epien kaka chiege ni nindo kode ooyo, en mana budho mar luor maber kod nyasi kaka kit luo dwaro.

Pod amedo mana jiwo yawa duto mondo wamdre paro kuom timbewa mabeyogi.Kik ngato kawgi marach to in bende tem anena imiwa paro mari eyo mar dongruok ekindwa kaka Joka Onagi.

Kathuolo oyudore to wabiro medo puonjore kuom gik ma kelo kethruok mar Kendruok (Divorce) ekind dhako kod chuore.

Nyasaye mar Omogi Awando otelnu Uduto e piny Mangima.