JEXJALUO ****
OMIERI EN ANG'O?
Obokeni ondiki gi Harrison Yieko wuod Asembo Koduong'
Ajos Wuod Atiga,
Amoso Ajos kod josomo duto mag od otieng' ni misawa ruok. Wach moro thaga ahinya, moloyo togi osiepena maok joluo. Kuom ranyisi osiepna moro ma apala wuod lando ondikona kawuononi eod otieng' ni mondo apimne maber gima omiyo tinde oganda na odok lamo thuol kar Nyasaye. Podi ok aduoke nikech ok ang'eyo kaka awachi.
Ang'eyo ni ji epinje mopogore okawo thuol mopogore opogore. Jomoko machalo jo China dipim mana gi jaluo moneno Nyar Kamami kata ngege ma iwe kithni gokinyi e dho wath mar Kadedi. Gichame ma chuo odong mana gi korgi nono. Jomoko, ila jo Amerka madiere bende lame kaka nyasaye. Jomoko, kaka yawuot Aborigine modak Australia bende okawe kaka yath mar hera gi hawi, gima ber bedogo kendo neno seche duto. Kata kamano thoth ji epiny mangima okawo thuol kaka le marach moloyo. Jokristo bende okawo thuol kaka le marach moloyo le duto te bang nthogo (wuondo) dhano. Kuom mano, ji ochiko ewi apar koromo gi thuol to kidi kata rungu ema iyieyi ewiye sano sano. Emiyo hera man ekind Jo kaocha ma Nyakach gi omieri ni otamo wang'a ngang'.
Jo Nyakach oramo ni Omieri en hawi maduong' mabiro miyo piny chiek mana kaka osetimorega ka omieri obiro ehigni mokalo, ni kendo omieri emane omiyo Gor Kogalo okawo okombe mar East and Central ehiga mar 1997! Kendo giwacho ni mon gi jamni momako ich ndalo omieri goyo mana rude.
An awuon to aparo ni kapo gimoro maber notimore ndalo omieri to ne en mama koisidens to ok ni omieri emane okelo hawi. Kuom mano asiro pete mag kanisa mawacho ni omieri onego omi rungu modhi wang' achiel. Jotelo kaka Peter Odoyo mawacho ni omieri ber kik sirikal tug godo to olo jopiny. Dapime mana gi Sunkuli kata Ntimama mokaso kijende ma jo Maasai ni odhi odag ebungu ni gin moran to gin giwegi to nyithindgi ma mbese kijendego somo e mbambariany (university) maloka, ipuonjo gi Ngire (professor) mopogre opogre mondo obed joma nigi tijgi.
Mogik apenjo joluo duto masomo kar rado ka ni gin to gineno nang'o?
Ean osiepu mathiring'iny, wuod Asembo Koduong'.
HARRISON YIEKO (Nyako manyadundo lach ne gido lowo)
-----------------------
Ajos wuod Atiga: Amor mar yudo oboke mar Mig. Yieko wuod Koduong' en wach ma ber kendo ma medo joluo gi oganda ma moko yudo tiend ler kuom YIE gi KIT DAK joluo. An kaka ang'eye ranyisi mar Nyasaye biro e yore mopogore opogore, moloyo ne joluo kaka jogo moyie kuom Nyasach kwere, Nyasaye Nyakalaga, Obong'o Ngire, Ogonya, Ohinga Lwanda Radin, kodo nying ma moko ma ok anyal lose sani!
Nyasaye en chuny nono oonge ringruok kendo entie e chunywa, yo ma obirogo ne ogandane to ok nyal pim pimre nimar Sungu odagi loch Nyakwar Osimbo kane obiro e piny joratenge to ne okelonwa yor lamo Nyasachgi ma gin emane gi ng'eyo kaka ilamo, weche mathoth ka itemo penjo to inyisi ni mano DOGMA, kendo ok pingi, kitemo ni mondo iyud ler kuomgi to inyisi ni iyanyo Nyasaye kendo ni mano SAKRILEGO, mago to gi ma moko daher mar siro ni joluo pod nyaka lam mana Nyasach kwere mane ogolowa Misiri kendo otayowa nyaka wachopo Sudan kendo waridore piny Garang' kama lweny otime newa nyaka kawuono.
Joluo lamo Nyasaye e yore mopogore opogore; nitie HENDH'HO kaka yande aselero eweche mag KAR CHAKRUOK LUO, nitie kidienje mag yie togi HONNI mane osetimore e ndalo mokadho kaka; SIMBI NYAIMA, NYAMGONDHO, NYAKOYI, kod sani bende koro uwinjo hond Omieri Nyar Nyakach mago kik buogu ngang' gin mana kaka nochan gi wuon Oganda ni mago duto notimre.
Omieri nofwenyore e piny Karachuonyo higni ma chon kane en nyako ma jaber mane obedo min piny ma sani iluongo ni Kasipul. Kane oyudo Ndaya koro otho jakwath notero chiege mane iluongo ni Omieri, nonyuolo nyathi miluongo ni SIPUL, nying'ni nobiro kama; kane oyudo Rachuonyo dwaro chako nyathine Ndaya mane wuon dala to yawuoyi nodagi nito ere kaka jakwath; omwasi, nyalo chako wuon gi ka gin to pok gichako. Ochak nyathino guoge mokwayo godono, guoge niluongo ni Sipul. Mago e ogando ma sani oloso KASIPUL-KABONDO.
Kadok chien e hond Omieri en ranyisi ma kik watug godo kata obedo ni wasomo ma wachopo e mbarariany ma malo kaka migosi Yieko oselerono. Thuol to en thuol mak mana ni tipo mare to en ranyisi mar kit yie mar joluo. Gigo duto mane otimore e higa mar 1997 ne nyalo bedo ni gin hap Omieri to kata kamano gin mana kaka nochan ni biro timore e thuolo mowinjore. Nimar Omieri to nikodwa ndalo duto ok e thuolono kende.
Mogik daher kwayo Nyikwa Ramogi mondo omed jiwo tiend wachni nimar kaka andike nyalo bedo ni opogore gi pach jomoko. Eduond jodong' Abila duto asiro weche man malogo, kata kamano ng'ano ma nyalo medo mare moro bende nyalo mana medo.
Mig. Ajos wuod Atiga Ny'Ochola
Wuon Abila, Jaluo dot Kom
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher
winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.