JEXJALUO ****
Dongruok mar luo Nyanza
Aoro mos mogundho ni nyikwa Ramogi Ajwan'g kamoro amora ma gintiere. Adwoko
puoch gi pak man'gon'go ni joma ne oparo maber mar chako mbuyi ni ne oganda
mag joka nyar nam. Omiyo wapuonjore weche mag kitwa gi timbewa, chike mag
dak maber to kod weche mag siasa. Apwoyo ndi!!
Kata kamano jothurwa, weche mag dongruok tin e weche duto ma wachore ei
mbuyini. Kinde mokalo nyocha ne wasewinjo wach harambee mane otimore ne kuonde
tiegruok (schools) manie seme, wach mar nyieo nyamburko manego mach bende
wawinjo, kwayo solro ne NDP to gi mamoko. Akwano matin kende ma anyalo paro
gi sani mana kuom ranyisi..........
Kwayona chalo kama: Adier adier onge ng'ato mabiro gero luo Nyanza mak mana
wan Joluo, onge jadhoot moro mabiro loso thurwa mak mana wan wawegi. Saa
osechopo ma nyaka koro walokuru pachwa kendo wachak gero thurwa. Sunga man'geny
gi nyadhi kod n'gayi ok bi konyowa! Siasa maonge tim ok bi terowa kamoro;
Piny owacho osebolowa chakore 1969 kendo sirikal marwa ema osebedo kathirowa,
onge ber ma serikal osemiyowa mak mana dhier gi dok chien.
To koro sani saa osechopo ma ng'ato ka ng'ato nyaka openjore e chunye owuon
ni to: An awuon, ang'o ma asetimo ni thurwa? bende asekonyo gwen'gwa e yo
moro amora? kata obed gi ng'eyona (rieko)? mwanduna (resources)? mucha (energy)
Paro (ideas)? Koso en mana nyadhi gi sungo sombwa? To somo konyowa gi
ang'o ka ok onyal miyo ngimawa gi mar owetewa gi nyiminewa kata nyithindwa
winj maber?
Jothurwa, dongruok chakore kodwa wawegi. Ngato ka ngato nyaka tim makare
kar nyalone gi n'geyone. Kik warit jotendwa ma wayiero kaka Raila Amolo gi
oganda mamoko mondo obi otimnwa gik moko te. En mana lweny in bende kama iloso
iloso. Ngato machielo bende kamano.
Chieng moro jatelo mar piny mar Amerika, mane yamo oselalo (Nyakalaga oyie
oket chunye kama ber), Migosi J.F.Kennedy nowacho ni jothurgi niya : "Kik
Wapenjreuru gima pinywa osetimonwa, to wapenjre moloyo gima wasetimo ni pinywa"
An bende akwayo ogandawa ma joluo gi muolo niya: Wan bende wapenjre gima
wasetimo ni Luo Nyanza.
Chieng' moro nyodo (generation) ma bang'wa nochawa kagiwacho niya: "Joma
notelo, kayiem". To nikech giniwuor ni kasomo to wan, ka rieko to jaluo, ka
paro maler to jaluo, ka tich matek to jaluo, kwero weche maricho to jaluo,
kedo lweny motamo wang'ji mago dwaro mana jaluo, dak mochanore gi ler mano
jaluo. Adieri mago duto waberie ndi kendo onge dhoot moro mipimo kodwa.
To dongruok to ? Keno (investment) to? Konyo jowadwa to? Riwruok to? Luor
gi hera to?
Upar ahinya wachno jothurwa, an bende aparonu apara. Ka ok omorou to bende
ok rach, asetimo ma kara.
Udong maber joka nyanam, Nyasachwa oritu kuonde duto ma untiere.
En an Achiel Kodu,
Ochieng Bolo, Ja-Asembo Kolal
Ka in gi mari moro ma di wandik ka to orni
Akelo,Nyar Kager
jaluo@jaluo.com
Daher
winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.