JEXJALUO ****
Penjo Nelson Nyoturu
Penjo; Mig. Nelson Nyoturu
1.kadhako otho gi okola (kode) itimenade?
2.ka dhako ochuado dichuo ga ng'uola mare dhakoni
owinjore time nade? kata owinjore itim
ango'kagimakamano otimoreni. Bende dhakomakamano
ichako iterorigo ?
3.wuoyi maduong' otamore golo dala jomatindo bange
owinjore tim ang'o?
4.Wuoru yamoolalo kaeto minu oyudo jater kaionge dala
to in ewuoyi maduong edalano itimonang'o,to gigeni
mane iseninde edalakanyo bende dichak ininde koso
5.kogik ekinde maiakapango bende inyalonindo edala
mane otere mamani kaionge dala.
Ean
NYOTURU NELSON NYAKWAR OSALA
JAKAURA GITIENDE
Duoko; Mig. Ajos wuod Atiga
1. Dhako otho g'okola (kode) itimo nang'o?
Kuom chik Luo ma kare ka dhako otho gi kode to nyaka lage ka pok oyike,
mano ochuno ma onge gimoro ma abiro wuondi godo ni inyalo loki kata ni inyalo
tim kama. Jalak nyaka bed ng'ano ma ok anyuola chuore, onyalo bedo ja-K'Owiny
kata ja libamba moro ma onge joge. Nimar en tich ma nyalo rocho ng'ato chuth.
E piny masani to tinde jo-kanisa tieko moko mayot. Inyalo chak bure gi jo-lemo
kata dhako moro moti mose aa ariya kendo oseneko. Jo-kanisa ema tinge ka
tere e bur. Koro hero en mar gi anyuolani koda uero utieko kaka chik Luo
dwaro koda uhero jo-kanisa tiekonu wechego. Mano to wachni. Ywak ema kik
bed bang'e alosa ok rom min Yongo. Kata jo-lemo wachoni mag Kaisari mi Kaisari
mag Ruoth Bende mi Ruoth.
2. Dhako ochuado dichuo g'ang'uola kata Chieno (siruaru) mare dhakoni
owinjore time nade? kata owinjore itim ang'o? Bende dhako ma kamano
ichako iterorigo?
Chon gi lala ne en gima rach sidang' ka dhako omuoch mit ochwado chuore
gi siruaru, to ne en tich mayot nimar siruaru ne thoro bedo achiel koro mondo
ihosri yot. Dichuo ok onego donj e ot moro amora kata pi kik omodhi e od dhakono
nyaka tiek chike duto te.
Dichuo nyaka nyis owetene gima osetimore kendo dhakono nyaka om rombo dalagi,
iyango rombono, igolo wen kendo ibudo godo manyasi kod buru mar chieno (siruaru)
mane ochuadogo chuore chande. To sani ma tinde opang'gi turi ibiro ng'eyo
ni mane mane ochuadi godo?
Gima rach ka en sirauaru ma in ema ing'iewo ne dhako iwuon eka chira luwi,
gima ber ka isefwenyo ni dhako rieke yore to iliwe ka onindo kata ka owuok
to ipimo siruechegego duto te mondo omi kata chieng' moro ochuadigo to onge
gima time.
Kuom mago duto madho manyasi e yath ma nyalo konyi ka gima kamano otimore
kik wawuondre nnnNyikwa Ramogi ni nyocha wuon Abila owachoni ka asepimo anung'o
go te to kata ochwada godo to onge gima tima.
Mogik daher mar wacho ni ka dhako ochuadi gi siruaru to ber madho ma nyasi
nikech dipo ka gimoro otimore ka gir kirage ni achiel kuom siruechego pok
ipimo. Bang' madho manyasi to unyalo mana riworu onge gima rach.
3. Wuoyi maduong' otamore golo dala jomatindo bange owinjore tim ang'o?
Yawuoyi matindo ok nyal kuongo ne wuoyi maduong' golo dala kata obedo ni
chal nade, yawuoyi matindo nyaka rit ma wuoyi maduong' gol dala korka
oyawnegi, to kendo luwore mana e nyuol.
Kata kamano ka chik ochuno ni wuoyi matin nyaka gol dala motelo ne joma dongone
to gik ma onego tim gin; Ok onego opidh ojuok e dalane kata rangach kik ochungi
e dalano nyaka owetene madongo kande gol miechgi. Kendo ode ok onego dhoode
chom rangach, igere ka simba ka dhoode ochomo ariwa.
Dala wuoyi ma tinno owetege madongo ok nyal chieme kata wuon gi min ok onego
donje kata riwo kode lwedo e tawo achiel. Mano ema omiyo ok ber ka wuoyi
matin okuongo goyo dala ne joma dongone.
4. Dhako chuore otho ka wuode maduong' onge dala kendo otere korka wuoyino
obiro itimo nade? Ginindo mane wuoyino oweyo dala kanyo bende ochako otiyo
godo? Bende inyalo donjo e dala koter meru kain kapango?
Onge chik minyalo tieki ka wuoyi maduong' onge, irite nyaka oduogi eka
itieko chike liel. Miyo ok nyal ter ka wuode maduong' onge. Miyo kano chok
gwend magenga kendo ka wuoyino oduogo to imiye ochamo.
Kane wuoyino onge e liel to imiye manyasi mar dipo, kendo otieko kweche mag
liel kaka dwarore. Gige mag um mane oweyo to otiyo godo atiya onge chik modinone,
mak mana kane min mare kata ng'ato moluorore godo oumorego eka ok ochak otigo
kendo.
Miyo ok onego tiek chike liel ka wuode maduong' onge, kata kamano ka ochuno
to nyaka gimadh manyasi mar dipo kanyakla kato wuoyi tieko chike mag liel
kaka owinjore. To ok en gima ber ngang' omiyo anyuola nyalo keto bura mondo
oyal wachno kaluwore gi kit dak mar dalano ok anyal miyi duoko moriwo ji
duto. Tem Wuoyo gi anyuolani kuom wachno.
Mogik nyikwa Ramogi Nyasach Kwere mondo oritu ndalo duto, Ler mondo orieny,
chike Kwere obed kaka Ogayi ma tayowa ndalo duto!
Medwa Pachi kuom wechegi, nondwa en; WuonAbila@jaluo.com
Ka in gi mari moro ma di wandik ka to orni
Akelo,Nyar
Kager
jaluo@jaluo.com
Daher winjo dwondi in bende, iwinjo?
Kata inyalo oro twak kod weche manyien ne: Mig. Ajos wuod Atiga
WuonAbila@jaluo.com
: Riwruok mar JOLUO e Piny Ngima, orwaku uduto mondo ubed e kanyakla mar burani. Ornwa nyingi gi nondi kaka obedo. Riwruok e teko joka Nyanam.